Cla Biert a l’ASL

This content is available in Romansh, German, French or Italian. Please select DE, FR or IT at the top right-hand corner of this page.

Cla Biert (1920–1981) è sa profilà sco narratur realistic, intenziunà da documentar il mund agricul da si’uffanza e giuventetgna en Engiadina Bassa cun la maniera da viver e lavurar tradiziunala en il microcosmos dal vitg, cun tut sias varietads socialas ed er linguisticas – in mund ch’è silsuenter sa midà radicalmain a partir dals onns 1940 e 1950.

Cla Biert
Cla Biert, 1967
© Eredis Cla Biert / BN

Cla Biert è creschì si a Scuol en ina famiglia da magisters e purs. Suenter il seminari da magisters, il studi da magister secundar a Turitg e segiurns a Genevra, Losanna e Paris è Cla Biert stà magister en divers lieus dal Grischun, dal 1956 al 1975 a Cuira. Ses ultims onns ha el passentà a Sent. 

A partir dal 1948 ha Cla Biert publitgà raquints realistics e fantastics per uffants e creschids, cumparids en gasettas e periodics rumantschs ed en diversas collecziuns: «Pangronds» (1949), «Amuras» (1956), «Laina verda» (1957), «Fain manü» (1969). Vi da ses roman «La müdada» (1962) ha Biert lavurà dapi 1955. Curt suenter sia mort è vegnì publitgà il tom «Il descendent» (1981), or dal relasch èn cumparids «Las fluors dal desert» (1993) e ultimamain per il centenari «L’odur dal füm. Raquints 1949–1980» (2020). 

Gia las emprimas istorgias da Biert èn vegnidas translatadas en tudestg ed englais; fin oz ha si’ovra ina recepziun transversala a las linguas er en talian, franzos ed en ladin da las Dolomitas, tranter auter en ils volums «Bei den Teichen» (1963), «Only a game» (1969), «Das Gewitter und andere Erzählungen» (2009).

Biert è stà engaschà per la cultura rumantscha ed a medem temp in pedagog che è s’occupà cun psicologia, filosofia e psicanalisa. Sper si’activitad sco actur da teater en la truppa La Culissa, critic da litteratura e collavuratur dal radio ha el collecziunà ed interpretà cun la ghitarra chanzuns popularas rumantschas. Cun sia dunna Angelica Biert-Menzel è el sa preschentà er sin tribunas naziunalas ed internaziunalas. 

Last modification 01.06.2022

Top of page

Contact

Swiss Literary Archives
Swiss National Library
Annetta Ganzoni
Hallwylstrasse 15
3003 Bern
Switzerland
Phone +41 58 464 03 16
E-mail

Print contact

https://www.nb.admin.ch/content/snl/en/home/about-us/sla/estates-archives/focus/biert.html