Il nanin en la stgatla d’archiv

Era sche la lavur da giardinier na plascheva betg tant a Flurin Spescha, el ha relaschà in nanin d’iert – e per quel ha el stgaffì in omagi litterar.

Dad Annetta Ganzoni

 
 
 

La cromaria d’objects ch’èn passads suenter la mort prematura da Flurin Spescha da sia scrivania en la trucla da metal per elegants chalzers da dama scozais quintan tantas istorgias: per exempel da l’attractivitad dad accessoris da biro istorics u dal grond engaschament pels Dis da litteratura, che Spescha ha confundà en il 1990 e documentà acribicamain durant in decenni.

Nanin d’iert che legia tschentà sin l’ur d’ina stgatla d’archiv. Davosvart ves’ins auters objects da scrivania: egliers rudunds, pins culurids ed in vegl perfurader.
Il cumpogn da scrivania da Flurin Spescha
© BN, Simon Schmid, 2018

Malavita n’esi betg enconuschent, sco che la figura da terracotta – il nanin-prelectur enconuschent en «nanologia» – è rivada tar Flurin Spescha. Quel era pli fascinà dal leger e scriver che da las lavurs en iert che vegnivan dumondadas dad el sco uffant, sco ch’i sa lascha facilmain eruir or da divers da ses texts cun fund biografic. Il protagonist chapitschà or dal relasch è però surprendentamain net e na para propi d’avair experienza dad iert, dentant dispona el d’ina parentella litterara illustra.

Tranter ils raquints preparativs da Flurin Spescha per il tom Der zwölfte Tag danach sa chatta l’istorgia «Phantasien eines Gartenzwergs». Il volum è cumparì tar l’editur Pendo en il 1998 – a temp per la preschientscha svizra sco pajais giast a la fiera da cudeschs da Francfurt. Tranter ils materials èn conservadas er notizias da la planiasaziun per finir quest’ovra davent da principi december fin al termin da consegna en mars. «Wie schaffe ich es, Kurzgeschichten ohne Vorgabe, d. h. ohne (konkreten) Auftrag einer Zeitung o. ä. zu schreiben? […] Nur, kommt der Kick, der notwendige Impuls, wenn der Auftrag nicht unmittelbar an den tagesjournalistischen Produktionsablauf gebunden ist?» sa dumonda il scriptur multifar, redactur, traductur ed incumbensà da comunicaziun dal president da la citad da Turitg.

Ils raquints n’eran insumma betg l’unica occupaziun da Spescha durant quest 1998 chargià: Sco conredactur da la revista Litteratura era el partecipà a la producziun pretensiusa da l’ediziun 22. Sin incumbensa da Pro Helvetia era en preparaziun la pitschna antologia da litteratura contemporana, Binnenwelten. Stimmen aus der Schweiz, e qua è finalmain cumparida l’istorgia dals nanins d’iert da Spescha. En il pream vegnan circumscrittas sias qualitads: «Ein abgründiger Humor, der seinesgleichen sucht, und die unter der Oberfläche der Texte lauernde Ironie zeichnen seine Texte aus.»

Der letzte Garten vegn quintà tuttafatg or da la perspectiva dal nanin Heiri. Sa basond sin la litteratura specifica, e surtut sin Zipfel auf! Alles über Gartenzwerge da Fritz Friedmann (1994), in «cudesch da furmaziun e lectura puramain scientific», sa referischa Spescha en la parabla dal curs da vita da Heiri sin l’istorgia da cultura dal «nanin d’iert autentic ed animà». E nanins d’iert han ina vita privlusa: Uschè ha il «muviment per la deliberaziun dals nanins d’iert» rapinà il nanin-prelectur uriundamain francofon or da ses iert paradisic en Frantscha dal Sid per al manar en in guaud inabitabel. Ed alura è el arrivà en in ambient ester e decadent, nua che ses collagas pireschan da malatias legendarias sco il schanugl da chapitscha cotschna, il torticol d’iert e la spadla da charretta. Uschè vaiva Heiri baingea pers ses cudesch, ma na si’expressiun amiaivlamain paschaivla.

In Domat/Ems aufgewachsen, studierte Flurin Spescha (1958–2000) in Zürich Romanistik und Literaturkritik und publizierte ab 1981 auf Rätoromanisch und Deutsch.

Last modification 25.09.2019

Top of page

https://www.nb.admin.ch/content/snl/en/home/about-us/sla/einsichten---aussichten/einsichten---aussichten-2019/nanin-stgatla-darchiv.html