Andri Peer e ses temp en documents audiovisuals istorics
Questa publicaziun audiovisuala cuntegna ina selecziun represchentativa dad emissiuns or dals archivs da Radio e Televisiun Rumantscha e lur instituziuns precedentas.
Andri Peer e ses temp en documents audiovisuals istorics. Intervistas, recitaziuns da poesias, gieus radiofonics e critica litterara (1947-1982) or dals archivs da Radio e Televisiun Rumantscha, ed. Annetta Ganzoni, Berna, BN/ ASL, 2008.
Andri Peer ha collavurà a bleras emissiuns per radio e televisiun, sco autur, redactur, actur ed interlocutur. Quista publicaziun mussa la varietad surprendenta dad emissiuns litteraras en il temp da piunier da las medias modernas sco er l'engaschament dad ina gruppa d'auturs a favur dad in'avertura dal ambient cultural rumantsch.
En in temp da gronda prosperitad da la litteratura rumantscha era Andri Peer al center dad in'impurtonta modernisaziun da furmas e cuntegns, colliada ad ina mediaziun suror ils cunfins linguistics. Las tematicas dals gieus radiofonics van da la fin dal 19avel secul fin als onns 1970 ed includan l'alpinissem, l'istorgia e la psicologia sco er la convivenza sociala en vischnanca e citad. Questas emissiuns che cumpiglian pli che trenta onns d'istorgia pussibilteschan a medem temp l'invista ad in interessant svilup da la tecnica e da l'estetica da producziun en l'ambient da radio e televisiun.